Oldambtster Volkslaid

O, dat roeme laand
wied achter diek…
Al heugt ons wat Ol Dollerd dee:
zoveul verdween in t sliek –
Veur Beerte en veur Finnerwòld
diekerij zo duur as gòld,
vertraauwboar en schaauwboar.
Want Oldambt zegt groots:
t Zòlte woater, zoks heurt doar nait!
Ons Oldambt is groots op kloarhaid.

Braid weerszied van daip
gruit Scheemde kaalm
aal zunder stof of veul lewaai.
Kiek rond. En gain getjaalm,
Midwòlle is ain dagraais weerd,
wat men leert, is nait verkeerd:
gewishaid van vrishaid.
Want Oldambt zegt groots:
Schone locht is hier t beswoar nait!
Ons Oldambt is groots op kloarhaid.

Dròk in Laangestroat:
Adrillentjemaart
en d’Olle Witte zingt zien laid.
Of vrust t nog zo haard,
laauwloene ja; men is nooit kòld
van Oostwòld tot Kloosterhòlt,
waarmbloudeg en goudeg…
Want Oldambt zegt groots:
Lekker scheuvel-ies van t joar, nait?
Want Oldambt is groots op kloarhaid.

O, dat roeme laand
om Blaauwestad
doar t vòlk aal weer op kloeten kwam.
Ons woater is ons schat
in d’Schanze en Ol Dollerd hier –
en t beekje broest weer fier,
krachtdoadeg en stoadeg…
Want Oldambt zegt groots:
Och, men leeft hier aal zo roar nait!
Ons Oldambt is groots op kloarhaid.